¿Qué ye la moda? Pa mí la moda ye principalmente una forma d’espresión, la forma en que vistimos diz enforma de nós mesmes y como queremos que los demás nos vean asina que la moda nun ye puramente moda si nun hai un observador esternu.
Nestos meses de confinamientu la moda convirtióse nun llinguaxe ensin receptor, o lo que ye lo mesmo, redefinió dafechu la so capacidá espresiva pa falar, nel meyor de los casos, solo a quien se pon la ropa, con resultancies inesperaes.
Nació lo que The New York Times denominó hate-dressing, que ye la rotación absurda y desmotivada de ciertes prendes, el vistise colo que s’acaba d’ensugar nel tendal, al marxe de que diches priendas seyan guapes o fees, cómodes o incómodes, meyores o peores. Vamos, vistite colo primero qu’encuentres. El desinterés marca la pauta, anque dientro d’ella vaigan naciendo nueves tendencies como los conxuntos de puntu arreglaos pero informales qu’estren les tiendes últimamente.
Pero no fondero y magar el vestuariu actual, toes morremos de ganes por volver salir y salir arreglaes. Dempués de les crisis la moda siempres sufre una esplosión creativa. Pel momentu toca esperar esi resurdir de la moda pero los desfiles d’alta costura tán faciéndonos suañar. Yá sé que nenguna de nós viste d’alta costura pero d’ella podemos estrayer idees y tendencies pa la próxima temporada y suañar porque a la fin l’alta costura ye eso, un espectáculu que nos fai suañar.
Va unos díes que terminó la selmana de l’alta costura en París y anque yo siempres voi ser fan de la eternidá de Chanel y del feminismu de les últimes temporaes de Dior, anguaño toi gratamente sorprendida cola colección de Valentino. Toi un pocu nivel obsesión.
Lo primero que me sorprende ye’l planteamientu de la colección qu’afita una rellación íntima ya impresionante ente moda y música. Valentino inspira la so colección na música Massive Attack y ellos compunxeron la música del desfile, que foi virtual, inspiraos nel trabayu que faen los artesanos nos talleres de Valentino. La rellación ente moda y música siempres foi bastante estrecha, nun hai más que ver lo que fixo Wiwienne Westwood colos Sex Pistols y l’estética punk. Pero lo d’esta colección de Valentino, que se llama “Code temporal”, paezme que va más allá, ye una rellación más artística y sutil. “El tiempu como códigu y valor, pa reiniciase y reprogramase nuna Costura de güei qu’anova rituales y procesos clásicos per aciu de prendes diseñaes pa espresase, como tol mundu quier” dicen dende la mesma marca.
Y lo segundo que m’esteló de la colección de Valentino ye que, dende’l mio puntu de vista representa a la perfección el momentu presente na moda, podemos ver representaos los sentimientos y el desinterés de la pandemia pero tamién les esperances que tenemos puestes nel futuru de la moda y del mundu polo xeneral. Ver esti desfile ye como asomase per una rendixa y reparar, en positivu, los nuevos tiempos que tán por venir.
Valentino constrúi la so colección a partir de prendes cencielles en tonos tierra y crudos, que casi podríen formar parte del yá mentáu Hatedressing, pero de sópitu apaez el volume. Pantalones, vistíos y faldes con un volume casi imponible pero que representen el deséu que toes tenemos de volver vistinos, con mayúscules.
La rotura estética cola gama de tonos neutros consíguela con unos colores flúor que remana de forma sublime, nunca pensaríamos combinar un color flúor con un beige o un caldera pero funcionen, un vistíu verde flúor fai qu’un abrigu cenciellu de llana beige paeza lo más moderno del mundu y recuérdennos qu’hai esperanza, que tou va pasar y que la vida va dexar de ser gris y va volver a tou color. Valentino danos esperances pero tamién nos fai suañar cola fantasía de los texíos doraos de lamé y preséntanos unes sudaderes doraes increíbles, el hatedressing de l’alta costura.
Hai que recalcar tamién del desfile de Valentino que ye un desfile unisex y eso gústame porque creo que ye una gran meyora pa l’alta costura, fai ver que la alta costura non ye namái pomposos vistíos apinaos de tules y bordaos sinón que l’alta costura tamién ye la pureza de la xastrería, los cortes impecables y la calidá de los texíos.
Adulces tenemos d’esforcianos en romper cola desgana y escoyer meyor lo que ponemos. Salimos pocu pero podemos convertir les salíes a facer la compra nun homenaxe a nós mesmes. Nun Vistimos namái pa paecer curioses a quien pueda venos, arreglase y llevar ropa que nos presta tien un efectu positivu sobre’l nuesu celebru. Asina que la próxima vegada que salgas a la cai piensa en ti, nun pongas lo primero que pilles y pienses “va total, si namái voi a pol pan”, fai un esfuerzu y regálate a ti mesma’l momentu de vete bien vistía.