Esta selmana toca falar d’ocalitos, estos árboles que nos traen pela cai del amargor a los asturianos. Pues resulta que, nun sé si ye bona noticia o non, pero los ocalitos van xugar un papel fundamental na sostenibilidá de la industria de la moda.
Munches vegaes nun somos conscientes de la gran cantidá de borrafes y sustancies tóxiques que xenera la industria testil nel periodu de fabricación. Esto pon en peligru’l mediuambiente, el nuesu planeta y tamién la nuesa salú.
La solución pa poder menguar esta xeneración de desfechos perxudiciales pa’l mediu ye utilizar texíos ecolóxicos pa crear pieces tamién ecolóxiques. La moda sostenible o ecolóxica básase na confeición de ropa orgánico, esto ye, qu’emplega texíos que dende’l plantíu de les sos fibres hasta la so ellaboración tán llibres de productos químicos perxudiciales, curiando la naturaleza.
La producción testil ético llegó pa quedase, porque favorez un consumu responsable y beneficioso pal mediu ambiente. Nos últimos años distintos texíos d’esti tipu coyeron muncha fama como: l’algodón orgánico, el bambú, el llinu, el cáñamu o’l Lyocell.
En llinies xenerales esisten dos tipos de fibres testiles: les naturales y les químiques, el Lyocell cai en dalgún puntu entemediu. La materia primo principal pal lyocell ye la celulosa de la magaya de madera d’ocalitu, que se descompón químicamente nun caldu espesu que depués se bombia al traviés d’una filera de cabezal de ducha y tresfórmase en fibres pa poder texer. Poro, Lyocell pue definise con precisión como una fibra recuperao o refecho.
El Lyocell ye un productu biodegradable. La so fabricación nun produz subproductos nocivos pa la salú o’l planeta, mentanto la celulosa, el so ingrediente principal, consíguese de plantíos bien alministraos. El disolvente d’óxidu d’amina utilizao nun ye tóxico, y por cuenta de que la mayor parte d’ello recíclase na so producción, nun se llibera nel mediu ambiente.
El cultivu de los árboles que se precisen pa producir Lyocell nun rique de riegu nin de pesticíes. Per otra parte, ésta fibra sintético ye significativamente menos tóxico qu’otros tipos. El Tencel, que ye’l nome comercial pal Lyocell, produzse puramente a partir de la magaya de madera d’árboles d’ocalitu certificao pol Forest Stewardship Council (FSC) y la fibra lleva’l sellu calidable Pan-European Forest Council (PEFC). La crecedera y cultivu d’estos árboles d’ocalitu xixila la conciencia ambiental, amenorgando la necesidá de pesticíes o riegu.
Una de les principales crítiques ambientales al algodón ye la gran cantidá d’agua que precisa pa producir. Mentanto que se precisa bien poca agua pa la producción de Lyocell.
El texíu de lyocell tien una impresionante absorción, absuerbe’l mugor relativo en función de la temperatura de la piel, asegurando siempres la comodidá del que la viste o s’arropa con ello. Ye escepcionalmente nidio y perfeuto pa les persones de pelleyu sensible. Puede llavase a máquina. La tela fecho de fibres curties de Tencel ye asemeyao al algodón, pero nin s’engurria nin encueye. Les fibres más llargues de Tencel dan una sensación nidio y sedoso. Estes teles tienen una cayida impresionante y suelen usase en moda.
El pelleyu humano actúa como capa proteutora, regulando la temperatura corporal y calteniendo l’equilibriu hídricu. El texíu Tencel ye compatible con estes funciones, actuando como una segunda piel.
La sensación suxetiva de bienestar depende en gran midida de l’absorción del mugor y na estructura de la superficie de les fibres d’esti texíu, en comparanza con otres fibres que pueden dar llugar a irritaciones pola so aspereza. La superficie del texíu Tencel ye nidio y prestoso y ye posiblemente la fibra más afayadizo pa les pieles sensibles. Dicen que la ropa de cama d’esti texíu ye una bendición pa les persones de pelleyu sensible.
Les prendes feches con esti texíu avecen ser un poco más cares que les d’algodón porque los sos costos de producción son daqué mayores pero tamién les prestaciones de la prenda son meyores. Si se trata curioso nes llavadures vamos consiguir una prenda casi eterna, nun tenemos de llavales a muncha temperatura porque pueden sali-yos bolines, pero cómo’l texíu torga la crecedera de les bacteries tampoco va coyer mal golor fácilmente.
Esti texíu úsase abondo en vistíos tipu Denim porque dexa esi acabáu pero caltien la llixereza y la cayida carauterístiques del Tencel. Los colores avecen ser un poco más apagaos que nel algodón porque’l Tencel ye más malo de tiñir.
En moda yá podemos ver esti texíu dayuri, los grandes xigantes de la industria como Inditex o H&M apuesten fuerte por esti texíu y podemos ver cada vez más priendes feches con ello nes sos colecciones. Ye una bona noticia que la gran industria de la moda ponga les piles tocantes a la sostenibilidá y ta claro que’l Tencel llegó pa quedase porque nun fai falta más que facer una busca en google y apaécente prendes d’esti texíu de la marca que tu quieras.
Increíblemente dempués de toles crisis entá queden n’España fabricantes de texíu de primera calidá, como Textil Santanderina, qu’amás esmolécense pol mediu ambiente y tán al día coles últimes teunoloxíes testiles y que fabriquen Lyocell.
Asina que yá sabéis les qu’amamos la moda igual tenemos tamién empezar a amar los ocalitos porque son el futuru sostenible d’esta industria.