Vamos falar de moda, de la serie de moda, Los Bridgerton. Y ye que Los Bridgerton tán faciéndonos más llevadera esta tercer fola del Covid y déxennos suañar con volver a fiestes, a la vida social y a llucir modelinos. Toes morremos de ganes por quitar el chándal y volver a les cais con muncho Ringo Rango.
La verdá ye que dempués de ver la serie seguro que nun soi la única que s’imaxina n’una fiesta temática de los Bridgerton esti branu pero nun fai falta llegar a tantu, podemos estrayer les tendencies de moda de la serie y afaeles a un look más sieglu XXI.
Güei vamos ver cinco tendencies de la serie que puedes llevar, si te atreves, esta primavera branu.
Colores pastel
Los colores pastel anubrieron les pasareles d’alta costura esta temporada y na serie faen un interesante xuegu colos colores y les families, podemos apreciar la xerarquía ente les families polos colores qu’usen al vistir. Los Featherington son nuevos ricos y faen ostentación de la so condición a base de paxareros estampaos y brillosos colores. Los Bridgerton amuesen la so elegancia, saber tar y el posu de l’aristocracia Londinense al traviés de la gama d’azules, escuros pa los caballeros y tonos pastel pa les dames. L’azul pastel ye una de les tonalidaes que prometen ser tendencia nunos meses porque, na serie, la protagonista lluz esti tonu de siguío, que munchos yá bautizaron como ‘Bridgerton blue’. Si quies ser la reina de la elegancia y la sofisticación esti branu, o si quies pescar un duque, nun pue faltar esti color nel to armariu.
Maxi Estampaos
Ye normal ver les pasareles primavera branu llenes de flores pero anguaño, estos allegres estampaos, aterricen na clave más maximalista y colorista posible y lleguen bañando vistíos como asocede na serie. La moda sigue sufriendo l’apatía d’estos tiempos pandémicos y sobremanera nes pasareles vense colores llisos pero dalguna marca atrevióse colos estampaos floríos pa danos un pocu d’allegría y nada de flores liberty, anguaño pa romper cola monotonía de la vida lo que precises ye un maxivistíu de maxiflores. Con esti estampáu al estilu de les Featherington de xuro que nun pases desapercibida en nenguna fiesta.
Guantes
Los guantes llargos yá fueron tendencia esta seronda inviernu pero vamos poder siguir con ellos na primavera, pel branu yo nun los encamiento pero caúna que faiga lo que quiera colos sos looks. Nel desfile d’alta costura de Valentino viéronse guantes llargos hasta pa home. Eso sí, como faen les protagonistes de la serie, de cara a la primavera, meyor escaecer el cueru o la llana qu’apoderaron estos meses fríos y apostar por rasos, tules y sedes.
Los guantes llargos pasaron a la hestoria cola escena de Rita Hayworth en “Gilda” pero sintiéndolo enforma por Rita, cuando pensamos en guantes llargos yá namái vemos como’l Duque-y quita los guantes a Dafne.
El tul
Dende l’icónicu look de Carrie Bradshaw y la so saya de tul nel final de sexo en Nueva York el tul tuvo siempres nos nuesos corazones pero anguaño Los Bridgerton vuelven a xubir a la palestra y resurde con fuerza na alta costura de grandes firmes como Chanel y Victor and Rolf. Y dámos-y nuevos usos, podemos usalo pa la clásica falda de capes con volume, cuanto más volume meyor, pero tamién se lleva en mangues y camises xugando cola tresparencia y delicadeza d’esti texíu. Y en volantes con metros y metros d’esti finu texíu fruncíu p’afatar cualquier prenda.
Corte imperiu
Los vistíos de Corte Imperiu lleven el talle peraltu xusto debaxo el pechu, son ensin dulda la prenda más repitida ente les protagonistes de la serie y ye que yeren puru enclín nel periodu de Rexencia en Londres, dómina na que s’ambienta la serie, anque les sos creadores dexaron claro que nun ye “el típicu drama históricu sinón un mundu ficcionáu, más sexy”. El vestuariu de la serie ta inspiráu nel de la dómina pero ensin buscar el rigor hestóricu.
Yo esperaba qu’esti tipu de vistíu acabara, neto que los imperios pero resulta que non. Amás de Los Bridgerton, estos vistíos tuvieron bien presentes, bien al mio pesar, nes colecciones de primavera-branu 2021 de firmes como Dior.
A min el Corte Imperiu espántame, paezme lo más feo de la hestoria de la moda xuntu colos Godets pero a Josefina emperatriz de Francia encantába-y y como bona influencer de la dómina consiguió marcar tendencia. Anque llueu llegaría la mayor influencer de tolos tiempos, y devolvería el talle al so sitiu y el volume a les faldes pero eso pa otru día.
